Monday, June 14, 2010
HINKHUO BANG A’ TALAWM E ? (A Christian Perspective of Life)
Hinna/hinkhuo (Life) ichi bang ahiei? Bang hingchi um a, banga di’a hing um adiei? Leitunga hinna nei zousie - mihing, ganhing leh sing kungte - bang tup leh ngimna toh hing ki siem khie, ahilouleh, bangzieh a hing um adiei? Nalungsim in tami dohna (query) na bawl ngai tai?
Mihing hinkhuo lamdang!
Scientist minthang mama Charles Darwin in mihing hing pienkhiet dan toh kisai in Evolutionary Theory kichi ana pokhie a, hinna nei zousie ahun bangjel in kiheng ua, akiim le paam (environment) umdan toh kituoh in khosa uhi. Tami thugin dan in mihing khu zawng (ape) a hing kipan in, kum tampi khat zou in, tu a mihing melpuoh hing nei pan hi. Sakhuo nei, adieh in Christian ten, tami thugin pen pom thei lou uhi. Genesis ah vannuoi a sil um teng Pasian siem ahi dan kichien tah in tahlat in um hi. “Achiil in Pasian in lei leh van asiem..(Gen. 1:1)
Silbangkim Pasian siem ahi leh, ihinna zong ama siem china ahi mai hi. Bang tup leh ngimna toh ana siem adiei? Mipilpa leh Thugenpa Solomon in Proverb laibu ah hinkhuo leh pilna thu tampi ana gen hi. Ahoi leh siengthou, akitup, phatuom tah a hinkhuo zah ding dan leh pilna leh hoina del dingdan ngen ana uong gen hi. Atom lam ah, hinna leh amanphatna (life & its value) nasah tah in ana sui hi. Hinanleh, atawpna lam (Ecclesiastes) ah hinkhuo, pilna, hoina leh tawmngaina te “panna bei” (vanity/meaningless) chi mawh hi. Alamdang khat khu, tabanga hinna manphat dan gengen pan “ashi sate khu ahing nalaite sa’ng in hampha zaw uhi” chi tamai hi (Eccl 4:2). Proverb ah mihingte hinkhuo abul apat alaikim tan suut a, Ecclesiastes bung ah hinkhuo tawplam leh azawna (conclusion) bawl hi. “Aman pienni leh shini um sah a… lungkham hun leh kipah hun a um sah hi”. Tualeh, “adamsung teng…lunggimna, natna leh lungthahna toh athuoh nalai hi” chiin ana giel hi.
Solomon in tuabang a hinkhuo manphatdan gen masa napi a, atwpnalam a ahoimaw dan leh silphatuom lou dan a ang gen kiana azieh um ngei din gintat huoi hi. Silbangkim in kumtawn dailou ahi dan ensah hi. Ingaituo chieng, tam leitung hinkhuo pen hun tomnou sunga ding mawng mawng hina e chi kilang chien sah mai hi. Tualeh, tabang hinkhuo sauloupi bang tupna toh hing kibawl ahilouleh hing um a’diei le, chi doh tham ching hi. Lavui leh tangthu gelsiem William Shakespeare in mihing khu limchingtu(actor/actress) toh kibang a, leitungpen limchinna mun (stage) ahi, chi hi. Limchingtu’n hinkhuo lim dan sagi (7 ages) tan chiing hi. Aman hinna dengdel dan “liim” (shadow) toh zong ana tekah kia hi. Marshall Goldberg in “Mangpan sil khat ang pie a, tuajou chieng in ala kia jel hi. Tua khu - hinna ahi” ana chi hi. Sigmund Freud in hinkhuo in atuppi pen khu “shina” ahi achi hi. Banghitaleh, hinkhuo pen nopna leh dana kihal silkhat ahi. Solomon in aphattuomlouna anagen nua in zong “Pasian giing a, Ama masanga zaudan siem mite a ding in (silbangkim) ahoizaw ding…” ana chi veve hi (Eccl. 8:12).
Hinkhuo bang chi lep (mould) ding e?
Hinkhuo phattuom lou dan aki gen nua in alam/lep ding dan bang gen ngai e? I hinsung a ipaikhiet thei lou sil khat - hinna- ahi jieh a nelsie thei mai lou hi va’h. Solomon in zong buoina leh hamsatnate anagen a, nanleh adamdawi zong ana pe veve hi. Hichin achi a, “…damsung a ibawl dia hoipen khu thei patawp suoding leh kipah tah a um ding” (Ecl 3:12). Tam thu khu gihna (warning) toh pie a, khatvei chienga Pasian in isilbawl tung a thu khen ding ahi dan gen hi (11:9).
Ihinkhuo pen lep siem ngai a, innlam (construction) toh tekhin thei ahi. Jesun hinkho inn lamdan chi -2 anuajuite hil a: (1) suong tunga innlam leh (2) senel tunga lam. Suongtunga inn kilam pen detdou a, huipi guopi kinung in zong puosah zou lou hi. Senel tunga pen bailam tah in kipuoh in chimguoi thei hi. Tuajieh in hinkhuo lamdan theisiem poimaw didan hileh kilawm e! Roodney D in “hinkhuo khu kom-hawm (pits) a dim ahi” achi hi. Tamnah, suong in pen Jesu khrist toh kilam hinna genna himai ding in gintat huoi a, senel inn pen bang toh kitekhin adiei? Leitung sil chi tuom tuomte - sum le pai, nei leh gou, mihing pilna leh sil dangdang - atom a gen in, Pasian panglou “hinkhuo kiningching” kichi te genna ahi diei? Ngaituo pha lei, tamte mama mihing khat in ihin sunga idei pen leh duthusam pen hilou amah, hinkhuo ichi zong silpoimaw leh kisamte inei lou/panglou in, Pasian-thu mai a bang chi hin ding e? Tulai khovel ah tami silpoimaw masate (basic needs) banah sil tampi khantouna toh kituoh in hing um ta hi. Gente na’n, sum hau in building lienpi khat sung ah kateng ut a, asung ah vanhoi leh mantampipi nei ding kadei a, innmai lam ah motaw hoipen leh nalh pen ki-nga hen len, zi numei hoipen leh ching pen kinei nalai leh ilung dei teng kim phiel ding in gintat ahuoi hi. Tulai in khangthaten bike, car, mobile, jean toka, Korean sam style leh kicheina (fashion) zaat tuom tuom anumei-apasal in nei in jui sawm chiet uhi. Khovel gam khangtoute hindan ki enton ahi mai a, asietna um pawng sam lou hi. Asie hi ichi tahlezong, tuabang culture ah sietna um hi lou in, eiten isietpi uh hizaw ding hi.
Tulai khovel changkang leh masawnna gam ah khantouna chituomtuom science & technology lam ah muthei in um a, hinkhuo pen nidang kum 20 masang hunlai toh itee leh ‘vangam’ bang mai ta hi. Hinanleh, khovel khantouna ten ‘hinkhuo nuom’ ang pieh a izah te jieh in “suong-inn” a teng ihi diei? Hi sese lou in, hithei lou ding china zong hituom lou hi. Solomon in hausatna, pilna zatatna anei ban ah atahsa-utna (sexual desire) suh buching theina ding leh hah leh suon anei theina ding in ji/koppi 1000 tah nei vial vual hi. Sildang nopsahna ban ah nupa kipawlna (sex) ah zong kipahna leh lungtaina ana hawl hi chi kilang hi. Tuajieh in, ngaituo lei, ama kaan a numei lungsim (psychology) thei siem vannuoi ah mi a um na diei, chi dohtham ching hi. Solomon in numei hoi leh manphatdan ana gen a, “inn khu numei pilna in atungding hi” ana chi a, “inn” chipen mihing khat hinna (life), innsung (family) leh khotang hinkhuo(society) tanphah genna ahi ding hi. Pasal khat hinkhuo pen numei hoikhat zieh in kitung ding thei hi china zong ahi ding hi. Hinanleh, dahuoi tah chi ding adiei, Solomon in zi 1000 aneite lah ah zipil/zihoi/numeihoi ana muzou lou hileh kilawm! Tuajieh in beidong pum in, “zi umdanhoi (zihoi) koi in amu zou diei!” ana chi hi (Pro. 31:10). Tulai khovel ah zong miten hinkhuo anop thei bang pen in kizah sawm a, pilna siemna leh bukimna kidel a, duthusam teng nei ding ki ut chiet hi. Khovel atahsapna neilou kiningching pen a kigen Lengpa Solomon in amu zou lou silkhat eiten imuzou di’ uoi le?
Deiteng nei theina ding hilou in, hinna sutzop theina hamham dinga niteng a neh leh tah suitawm adim in ki um hi. Eden huon apat nawdoh ina hilai a sapsietna ina tangh pen ilung ah igeel kha jel ei? Khosa pankai a neh leh dawn sui dinga Pasian sap kihi zou a, tuajieh a, silkhatpou bailam tah a muthei um lou dan ahi. Nuomtah a idei ingaite mutheilou mai hilou in, phal (permitted) zong kihi lou dan hi. Bible ah Pasian in asil siemte lah a mihingte hamphatna zattuom (special provision) ang na pie a, tuami amangthang den ding ana phal tuon lou dan kimu hi. Hinanleh, Pasian in, ama toh ina kikhen nua in zong, kizop kiana ding lampi dang ana koi veve hi. Tamna igen ut khu ‘hundamna’ Atapa Jesu Khrist zal khu ahi. Hinkhuo manpha (suong-inn) inei thei nading khu khovel silte ana himasa lou in, ilunglai a Jesu Khrist nei den/phudet khu ana hizaw ding hi. Thupil khat in “Nalung sim - lailung tah - a um pen pen khu na pasian ahi” ana chi hi. Bang adiei leh ka lungsim lailungtah a um zing? Tahsa hinkhuo a kalungdei(duthusam) zat tuomtuomte maw, Jesu Khrist maw? Solomon in tuabanga ahausat vang in, “leitung ah bangma ilutpi sih ua, inuosie chieng un zong bangma ipokia thei sih ding uh” ana chi hi. Ahileh, leitung sil zousiete nelsie mai a Pasian maimai ngaisah ding ahi diei? Langkhat kia ah, Pasian in mihingte a di’n “lungguot (plan) kanei hi”, tua khu “gimna ding hilou, hausatna, lametna leh hamuonna ahi” chi jel hi (Jereh 29:11).
Hinkhuo khu igeel vengveng chieng in theisiem bailam ding bang nanleh asunggil tah isui leh namai hilou hi. Leitunga mipilpen a Bible in ana gen Solomon zong buoi zou hi. American scientist, Dr. Louw Alberts khu hinkhuo/life tungtang ngaidan bang anei ei chia tanchin suiten dohna abawl uleh hichin dawng hi: “Kei ngaidan in hinkhuo umjie ahileh ihinsunga Pasian bukimna suikhiet a, kei mihingtunga A lungdei bang ahiei chi suikhiet ding… asetawp khawh a gen in, mi koi ahiei khat in kakung ah Pasian a um sih chia a’ng thuzaw ahileh tua hun apat in kahinna in umjie leh phattuomna anei nawn sih china ahi mai hi”. Mathematician minthang Dr. David Block in hinkhuo meaning khu Pasian - Alpha leh Omega suikhiet ding achi hi. Tuakhu hinkhuo/hinna lepna dia vanzah hoipen himai lou ding amah kachi hi.
Thutah bang e?
Winston Churchill in “leitunga sil manpha pen khu Thutah ahi; tam Thutah khu manpha seng seng in zuouthu ten vengbit zel uhi” ana chi hiel hi. Khristiante a ding in khovel hausatna, nunnopna, kipahna leh adang dangte khaam ahisih chi imuchien thei hi. Hinanleh Churchill genbang in Thudih/Thutah (Truth) suidoh masah poimaw hi. Jesu’n “ Pasian gam leh Adihtatna sui masa un…adangte pieh belap nahi ding uh”(Matt.6:33). Tamnah, “ Pasian gam” khu Jesu Khrist tungtawn a hundamna (Vangam) china hitaleh, “Adihtatna” khu Jesu nei-hinkhuo (Pasian deidan hinkho jat) genna hi ngei ding hi. Tualeh. “Adangte” kichite khu leitung a nei leh lam, nopsahna, pilna-siemna, kipahna leh adang dangte genna ahi ding hi. Tamte khu “abelapna” ana chi a, apoimaw masa pen in ana koi lou hi. Ahileh, agam leh adihtatna masang in ‘adangte’ sui masa lei bang achi diei? Tulai in mitamzawten tam ‘adangte’ ithupi ngai uleh ihawl masat seng zieh ua I Khristian hinkhuo leh isociety uh pumbuoi gawp hita va maw!!
Tuazieh in Thutah kichi khu Pasian-thu leh Pasian mama ahia, Ama theichien khu thutah thei ahi mai hi. Khum khu sakhuo hing kipatdan toh kizawi tawn sim hi. Jesu Khrist nuajui leh Ama gingta ten Ama sakhuo jui ua, Aman khovel thuginpi (belief) tampite lah apat in atuom in hankhie a, tuakhu “hattuom” hing kipatna ahi. Jesu Khrist hattuom/sakhuo khu khovel a mipil-misiemten sakhuo hing piendan ana gente utoh kibang lou hi. Sociologist ten sakhuo kichi mihing in asiemtawm ahia, mihingte damtheina ding, khotang hinkhuo a kilemna leh kituohna, mimal leh khotang in hamuonna leh bitna anei theina dinga hing kibawl khie ahi dan gen uhi. Sakhuo igente khu - Hinduism, Muslim, Buddhism, Taoism, Animism, Christianity leh adang-dangte ana genna ahi. Malai in dawi le kau, muthei/mutheilou thaneitute (natural calamities) leh zauhuoi silte apat kivenna ding leh damna ding deina in ‘mutheilou’ pasiante ana bie uhi. Huisie guosie, jinling leh tahsa damlouna, shinate khu mutheilou hagaute nasep hiding in ana gingta ua, amaute (hagaute/dawite) suhlungkim na ding in silpieh leh maitam kichite ana bawl jel uhi. Tamkhu lawki (pagan religion) ana kipatdan zong ahi. Tunitan in tabang sakhuo zui khovel ah mihing tampi um nalai hi. Tualeh azuitute mudan in tami sakhuo khu adihpen leh ahoipen ahia, amaute a din - Thutah bukim - ahi ngei ding gintat um hi. Hinanleh Khristian sakhuo zuite a ding in “Thutah” kichi tuabang ana hilou hi.
Jesu Khrist in anuajuite kung ah “kathugente nakipom ua hileh kanuajuite nahi tahtah uhi. Tualeh Thutah nathei ding ua, tua thutah in noute ahing suotah sah ding hi (Jh 8:31, 32). Tuabanah tua ‘thutah’ bang ahiei chi ahil kia a, “Kei Lampi, Thutah leh Hinna khu kahi. Kei a peilou in koima Pa kung atung sih ding hi” ana chi kia hi (Jh.14:6). Chiemte thei in, Hinna leh Thutah bang ahiei, tualeh koi ahiei, chi ahil chien hi. Nuajuiten Hinna anei ua Thutah zong athei ua tualeh Lampi dih ajui ding uh adeisah hi. Hinna bang ahiei? Chi tutan in ina sui nalai a, ahileh, bangpen tah ahiei chi tu’n imu chien tai le? Jesun “Pa kung” achipen shinua chieng a zotmun-Vangam agenna ahi. Jesu kung lou ngala hinna/hinkhuo um lou, thutah um lou leh lampi dih zong umlou china himai lou ding e..Tuaban ah vangam lut theina lampi umsun zong ahimai ding hi.
Thutah thei dia poimaw a ngaisut huoi kia khat khu leitung leh asunga um zousie Pasian siem hi a, ama lungguot (plan) ngen ana hi ahi (Col 1:16). Mihingte pilna-siemna zousie ama bawl ahidan zong ana gen a, “Keima pilna kahi…thusungkul mutheina kanei hi” (Pro 8:11). Mihingte hausatna leh lawchinna nasan zong Ama apat ahidan gen hi (v. 17).
‘Hinkho-manpha’ bang e?
Thutah poimaw pente lah a khat ahileh hinkho-manphatna thei ding khu ahi. Hinkhuo khu thakhat thu (accidental) a hing kibawl/hing mawh um ahilouleh sing hawm-suonghawm apat hing pawt doh ahisih chi kithei hi. “Mangpa khu noute hing siempa leh naubu sunga hing siempa” chin Isai in ana gen hi (Isa 44:2). Nu- naubu sunga pat siema ki um a, accidental a hing pieng ihi lou a’hileh hinna in akizahna, poimawna leh azieh (purpose) anei china ahi. Ludwig Wittgenstein in tambang in ana gen hi, “To believe in God is to realize that life has a meaning (Pasian gintat khu hinkhuo in umjie/manphatna anei hi chi theikhietna ahi)”.
Hinanleh, hinkhuo khu saulou jel hi. Psalm laa in “muol a pape” toh ana tekaah hi. Greek poet Homer kichipan hinkhuo khu nata/singna toh tekhin a, Greek philosopher Empedocles in meikhu (smoke) toh kibang in gen hi. Job in “mihing damsung hun pen bihieh sa ahia, ahinkum ding zong tee sa ahibou hi” chi hi (Job 14:5). Khatvei toh Thugenpa tangkouna ah lut kia vai. Aman khovel sil umdan teng - leitung pilna siemna, Pasian silsiem lamdanna leh Pasian in mihing asiem a hinna apieh, leitunga hinkhuo azahsah dan thugil zousie theisiem tum in ana sui tinten a, hinanleh, lawsam hi.
“Keiman kalungtang ah Pilna leh mihing khat in sun leh zan a ihmu lou zen a, anasep gimdante theisiem ka sawm lai in, Pasian silbawl zousie kana mu hi. Nisa nuoi a ana kibawl nasep zousie mihing in amudoh thei sih hi, suidoh ding in…panla nanleh amu tuomlou ding zieh in, mipil in thei tum ngong nanleh amudoh zou tuom sih ding hi, chi kamu kheta ta hi” (Eccl 8:16,17).
Pilna mihing in nei nanleh abukimlou (limited) ahi chi hing theisah a, tuazieh in Pasian’ pilna leh Ama apat pilna ki tangh/kizil khu pilna buching pen hing hithei pan ding dan hi. Tualeh, leitunga ihinsan pen uh bang a’ta diei le? Pasian khu ihinna lailung tah a tengsah ding; tahsa-hagau a khanlet ding, imihing tanpite, uleh naute (adieh in migentheite) lungsiet a panpi ding leh vannuoi a Pasian silsiem dangte it a kepbit ding chite hilel lou ding amah? Athupi pen itna nei ding chi Bible ah kigen hi. Apoimaw vawt khat khu leivui a siem leivui ma a kile kia ding itahsa ahia, ihagau ashithei nonlou ding pen in heilam azuon diei? Ihagau zotmun ding itahsa damlai pet a siemtup masah ding khu mihing hinsan poimaw pen hiva kachi hi. Tua bang in bawllei ‘hinkho-manpha’ pen nei leh zangtu kihimai lou ding e..
Sawltah Paul in ‘hinna’ khu mitmu toh kisai hilou in, ginna toh kisai ahi dan ana gen hi. Nikhatni chienga Vangam a umding ahi dan ana gen masa a, hinanleh, khumi ni hing tung masanga leitung ateenna mun a hinkho man dingdan zong ana gen hi. “Tasung inn ahiei khusung inn ahiei ah ka um zong un, Ama kaki pahsah nuom uhi” (IICor.5:9). “Tasung inn” achi khu leitung agenna ahia, “khusung inn” achipen vangam agenna ahi. Theidi’a poimaw pen khu Paul in ama mai hilou, gingtu zousie’n vangam atunchieng mai ua hilou in, leitung a atensung ua zong Pasian na sem a kipahsah ding khu adeisah hi. Leitung a Pasian kipahsah nading a ana sep khu bangte ata diei le? Sun zan a Pasian kunga thum thum mai ahisihleh Athu gengen chite mai ahi diei? Tuate banah, ulenau kilungsiet a migenthei lungsiet ding leh tahsa hinkhuo leh nasepnate a dihtat ding chite zong telpha mama hi. Apoimaw pen zong hiphiel ding hi. [Beita]
[Laigeltu ikup nuom leh suopizou@gmail.com]
Mihing hinkhuo lamdang!
Scientist minthang mama Charles Darwin in mihing hing pienkhiet dan toh kisai in Evolutionary Theory kichi ana pokhie a, hinna nei zousie ahun bangjel in kiheng ua, akiim le paam (environment) umdan toh kituoh in khosa uhi. Tami thugin dan in mihing khu zawng (ape) a hing kipan in, kum tampi khat zou in, tu a mihing melpuoh hing nei pan hi. Sakhuo nei, adieh in Christian ten, tami thugin pen pom thei lou uhi. Genesis ah vannuoi a sil um teng Pasian siem ahi dan kichien tah in tahlat in um hi. “Achiil in Pasian in lei leh van asiem..(Gen. 1:1)
Silbangkim Pasian siem ahi leh, ihinna zong ama siem china ahi mai hi. Bang tup leh ngimna toh ana siem adiei? Mipilpa leh Thugenpa Solomon in Proverb laibu ah hinkhuo leh pilna thu tampi ana gen hi. Ahoi leh siengthou, akitup, phatuom tah a hinkhuo zah ding dan leh pilna leh hoina del dingdan ngen ana uong gen hi. Atom lam ah, hinna leh amanphatna (life & its value) nasah tah in ana sui hi. Hinanleh, atawpna lam (Ecclesiastes) ah hinkhuo, pilna, hoina leh tawmngaina te “panna bei” (vanity/meaningless) chi mawh hi. Alamdang khat khu, tabanga hinna manphat dan gengen pan “ashi sate khu ahing nalaite sa’ng in hampha zaw uhi” chi tamai hi (Eccl 4:2). Proverb ah mihingte hinkhuo abul apat alaikim tan suut a, Ecclesiastes bung ah hinkhuo tawplam leh azawna (conclusion) bawl hi. “Aman pienni leh shini um sah a… lungkham hun leh kipah hun a um sah hi”. Tualeh, “adamsung teng…lunggimna, natna leh lungthahna toh athuoh nalai hi” chiin ana giel hi.
Solomon in tuabang a hinkhuo manphatdan gen masa napi a, atwpnalam a ahoimaw dan leh silphatuom lou dan a ang gen kiana azieh um ngei din gintat huoi hi. Silbangkim in kumtawn dailou ahi dan ensah hi. Ingaituo chieng, tam leitung hinkhuo pen hun tomnou sunga ding mawng mawng hina e chi kilang chien sah mai hi. Tualeh, tabang hinkhuo sauloupi bang tupna toh hing kibawl ahilouleh hing um a’diei le, chi doh tham ching hi. Lavui leh tangthu gelsiem William Shakespeare in mihing khu limchingtu(actor/actress) toh kibang a, leitungpen limchinna mun (stage) ahi, chi hi. Limchingtu’n hinkhuo lim dan sagi (7 ages) tan chiing hi. Aman hinna dengdel dan “liim” (shadow) toh zong ana tekah kia hi. Marshall Goldberg in “Mangpan sil khat ang pie a, tuajou chieng in ala kia jel hi. Tua khu - hinna ahi” ana chi hi. Sigmund Freud in hinkhuo in atuppi pen khu “shina” ahi achi hi. Banghitaleh, hinkhuo pen nopna leh dana kihal silkhat ahi. Solomon in aphattuomlouna anagen nua in zong “Pasian giing a, Ama masanga zaudan siem mite a ding in (silbangkim) ahoizaw ding…” ana chi veve hi (Eccl. 8:12).
Hinkhuo bang chi lep (mould) ding e?
Hinkhuo phattuom lou dan aki gen nua in alam/lep ding dan bang gen ngai e? I hinsung a ipaikhiet thei lou sil khat - hinna- ahi jieh a nelsie thei mai lou hi va’h. Solomon in zong buoina leh hamsatnate anagen a, nanleh adamdawi zong ana pe veve hi. Hichin achi a, “…damsung a ibawl dia hoipen khu thei patawp suoding leh kipah tah a um ding” (Ecl 3:12). Tam thu khu gihna (warning) toh pie a, khatvei chienga Pasian in isilbawl tung a thu khen ding ahi dan gen hi (11:9).
Ihinkhuo pen lep siem ngai a, innlam (construction) toh tekhin thei ahi. Jesun hinkho inn lamdan chi -2 anuajuite hil a: (1) suong tunga innlam leh (2) senel tunga lam. Suongtunga inn kilam pen detdou a, huipi guopi kinung in zong puosah zou lou hi. Senel tunga pen bailam tah in kipuoh in chimguoi thei hi. Tuajieh in hinkhuo lamdan theisiem poimaw didan hileh kilawm e! Roodney D in “hinkhuo khu kom-hawm (pits) a dim ahi” achi hi. Tamnah, suong in pen Jesu khrist toh kilam hinna genna himai ding in gintat huoi a, senel inn pen bang toh kitekhin adiei? Leitung sil chi tuom tuomte - sum le pai, nei leh gou, mihing pilna leh sil dangdang - atom a gen in, Pasian panglou “hinkhuo kiningching” kichi te genna ahi diei? Ngaituo pha lei, tamte mama mihing khat in ihin sunga idei pen leh duthusam pen hilou amah, hinkhuo ichi zong silpoimaw leh kisamte inei lou/panglou in, Pasian-thu mai a bang chi hin ding e? Tulai khovel ah tami silpoimaw masate (basic needs) banah sil tampi khantouna toh kituoh in hing um ta hi. Gente na’n, sum hau in building lienpi khat sung ah kateng ut a, asung ah vanhoi leh mantampipi nei ding kadei a, innmai lam ah motaw hoipen leh nalh pen ki-nga hen len, zi numei hoipen leh ching pen kinei nalai leh ilung dei teng kim phiel ding in gintat ahuoi hi. Tulai in khangthaten bike, car, mobile, jean toka, Korean sam style leh kicheina (fashion) zaat tuom tuom anumei-apasal in nei in jui sawm chiet uhi. Khovel gam khangtoute hindan ki enton ahi mai a, asietna um pawng sam lou hi. Asie hi ichi tahlezong, tuabang culture ah sietna um hi lou in, eiten isietpi uh hizaw ding hi.
Tulai khovel changkang leh masawnna gam ah khantouna chituomtuom science & technology lam ah muthei in um a, hinkhuo pen nidang kum 20 masang hunlai toh itee leh ‘vangam’ bang mai ta hi. Hinanleh, khovel khantouna ten ‘hinkhuo nuom’ ang pieh a izah te jieh in “suong-inn” a teng ihi diei? Hi sese lou in, hithei lou ding china zong hituom lou hi. Solomon in hausatna, pilna zatatna anei ban ah atahsa-utna (sexual desire) suh buching theina ding leh hah leh suon anei theina ding in ji/koppi 1000 tah nei vial vual hi. Sildang nopsahna ban ah nupa kipawlna (sex) ah zong kipahna leh lungtaina ana hawl hi chi kilang hi. Tuajieh in, ngaituo lei, ama kaan a numei lungsim (psychology) thei siem vannuoi ah mi a um na diei, chi dohtham ching hi. Solomon in numei hoi leh manphatdan ana gen a, “inn khu numei pilna in atungding hi” ana chi a, “inn” chipen mihing khat hinna (life), innsung (family) leh khotang hinkhuo(society) tanphah genna ahi ding hi. Pasal khat hinkhuo pen numei hoikhat zieh in kitung ding thei hi china zong ahi ding hi. Hinanleh, dahuoi tah chi ding adiei, Solomon in zi 1000 aneite lah ah zipil/zihoi/numeihoi ana muzou lou hileh kilawm! Tuajieh in beidong pum in, “zi umdanhoi (zihoi) koi in amu zou diei!” ana chi hi (Pro. 31:10). Tulai khovel ah zong miten hinkhuo anop thei bang pen in kizah sawm a, pilna siemna leh bukimna kidel a, duthusam teng nei ding ki ut chiet hi. Khovel atahsapna neilou kiningching pen a kigen Lengpa Solomon in amu zou lou silkhat eiten imuzou di’ uoi le?
Deiteng nei theina ding hilou in, hinna sutzop theina hamham dinga niteng a neh leh tah suitawm adim in ki um hi. Eden huon apat nawdoh ina hilai a sapsietna ina tangh pen ilung ah igeel kha jel ei? Khosa pankai a neh leh dawn sui dinga Pasian sap kihi zou a, tuajieh a, silkhatpou bailam tah a muthei um lou dan ahi. Nuomtah a idei ingaite mutheilou mai hilou in, phal (permitted) zong kihi lou dan hi. Bible ah Pasian in asil siemte lah a mihingte hamphatna zattuom (special provision) ang na pie a, tuami amangthang den ding ana phal tuon lou dan kimu hi. Hinanleh, Pasian in, ama toh ina kikhen nua in zong, kizop kiana ding lampi dang ana koi veve hi. Tamna igen ut khu ‘hundamna’ Atapa Jesu Khrist zal khu ahi. Hinkhuo manpha (suong-inn) inei thei nading khu khovel silte ana himasa lou in, ilunglai a Jesu Khrist nei den/phudet khu ana hizaw ding hi. Thupil khat in “Nalung sim - lailung tah - a um pen pen khu na pasian ahi” ana chi hi. Bang adiei leh ka lungsim lailungtah a um zing? Tahsa hinkhuo a kalungdei(duthusam) zat tuomtuomte maw, Jesu Khrist maw? Solomon in tuabanga ahausat vang in, “leitung ah bangma ilutpi sih ua, inuosie chieng un zong bangma ipokia thei sih ding uh” ana chi hi. Ahileh, leitung sil zousiete nelsie mai a Pasian maimai ngaisah ding ahi diei? Langkhat kia ah, Pasian in mihingte a di’n “lungguot (plan) kanei hi”, tua khu “gimna ding hilou, hausatna, lametna leh hamuonna ahi” chi jel hi (Jereh 29:11).
Hinkhuo khu igeel vengveng chieng in theisiem bailam ding bang nanleh asunggil tah isui leh namai hilou hi. Leitunga mipilpen a Bible in ana gen Solomon zong buoi zou hi. American scientist, Dr. Louw Alberts khu hinkhuo/life tungtang ngaidan bang anei ei chia tanchin suiten dohna abawl uleh hichin dawng hi: “Kei ngaidan in hinkhuo umjie ahileh ihinsunga Pasian bukimna suikhiet a, kei mihingtunga A lungdei bang ahiei chi suikhiet ding… asetawp khawh a gen in, mi koi ahiei khat in kakung ah Pasian a um sih chia a’ng thuzaw ahileh tua hun apat in kahinna in umjie leh phattuomna anei nawn sih china ahi mai hi”. Mathematician minthang Dr. David Block in hinkhuo meaning khu Pasian - Alpha leh Omega suikhiet ding achi hi. Tuakhu hinkhuo/hinna lepna dia vanzah hoipen himai lou ding amah kachi hi.
Thutah bang e?
Winston Churchill in “leitunga sil manpha pen khu Thutah ahi; tam Thutah khu manpha seng seng in zuouthu ten vengbit zel uhi” ana chi hiel hi. Khristiante a ding in khovel hausatna, nunnopna, kipahna leh adang dangte khaam ahisih chi imuchien thei hi. Hinanleh Churchill genbang in Thudih/Thutah (Truth) suidoh masah poimaw hi. Jesu’n “ Pasian gam leh Adihtatna sui masa un…adangte pieh belap nahi ding uh”(Matt.6:33). Tamnah, “ Pasian gam” khu Jesu Khrist tungtawn a hundamna (Vangam) china hitaleh, “Adihtatna” khu Jesu nei-hinkhuo (Pasian deidan hinkho jat) genna hi ngei ding hi. Tualeh. “Adangte” kichite khu leitung a nei leh lam, nopsahna, pilna-siemna, kipahna leh adang dangte genna ahi ding hi. Tamte khu “abelapna” ana chi a, apoimaw masa pen in ana koi lou hi. Ahileh, agam leh adihtatna masang in ‘adangte’ sui masa lei bang achi diei? Tulai in mitamzawten tam ‘adangte’ ithupi ngai uleh ihawl masat seng zieh ua I Khristian hinkhuo leh isociety uh pumbuoi gawp hita va maw!!
Tuazieh in Thutah kichi khu Pasian-thu leh Pasian mama ahia, Ama theichien khu thutah thei ahi mai hi. Khum khu sakhuo hing kipatdan toh kizawi tawn sim hi. Jesu Khrist nuajui leh Ama gingta ten Ama sakhuo jui ua, Aman khovel thuginpi (belief) tampite lah apat in atuom in hankhie a, tuakhu “hattuom” hing kipatna ahi. Jesu Khrist hattuom/sakhuo khu khovel a mipil-misiemten sakhuo hing piendan ana gente utoh kibang lou hi. Sociologist ten sakhuo kichi mihing in asiemtawm ahia, mihingte damtheina ding, khotang hinkhuo a kilemna leh kituohna, mimal leh khotang in hamuonna leh bitna anei theina dinga hing kibawl khie ahi dan gen uhi. Sakhuo igente khu - Hinduism, Muslim, Buddhism, Taoism, Animism, Christianity leh adang-dangte ana genna ahi. Malai in dawi le kau, muthei/mutheilou thaneitute (natural calamities) leh zauhuoi silte apat kivenna ding leh damna ding deina in ‘mutheilou’ pasiante ana bie uhi. Huisie guosie, jinling leh tahsa damlouna, shinate khu mutheilou hagaute nasep hiding in ana gingta ua, amaute (hagaute/dawite) suhlungkim na ding in silpieh leh maitam kichite ana bawl jel uhi. Tamkhu lawki (pagan religion) ana kipatdan zong ahi. Tunitan in tabang sakhuo zui khovel ah mihing tampi um nalai hi. Tualeh azuitute mudan in tami sakhuo khu adihpen leh ahoipen ahia, amaute a din - Thutah bukim - ahi ngei ding gintat um hi. Hinanleh Khristian sakhuo zuite a ding in “Thutah” kichi tuabang ana hilou hi.
Jesu Khrist in anuajuite kung ah “kathugente nakipom ua hileh kanuajuite nahi tahtah uhi. Tualeh Thutah nathei ding ua, tua thutah in noute ahing suotah sah ding hi (Jh 8:31, 32). Tuabanah tua ‘thutah’ bang ahiei chi ahil kia a, “Kei Lampi, Thutah leh Hinna khu kahi. Kei a peilou in koima Pa kung atung sih ding hi” ana chi kia hi (Jh.14:6). Chiemte thei in, Hinna leh Thutah bang ahiei, tualeh koi ahiei, chi ahil chien hi. Nuajuiten Hinna anei ua Thutah zong athei ua tualeh Lampi dih ajui ding uh adeisah hi. Hinna bang ahiei? Chi tutan in ina sui nalai a, ahileh, bangpen tah ahiei chi tu’n imu chien tai le? Jesun “Pa kung” achipen shinua chieng a zotmun-Vangam agenna ahi. Jesu kung lou ngala hinna/hinkhuo um lou, thutah um lou leh lampi dih zong umlou china himai lou ding e..Tuaban ah vangam lut theina lampi umsun zong ahimai ding hi.
Thutah thei dia poimaw a ngaisut huoi kia khat khu leitung leh asunga um zousie Pasian siem hi a, ama lungguot (plan) ngen ana hi ahi (Col 1:16). Mihingte pilna-siemna zousie ama bawl ahidan zong ana gen a, “Keima pilna kahi…thusungkul mutheina kanei hi” (Pro 8:11). Mihingte hausatna leh lawchinna nasan zong Ama apat ahidan gen hi (v. 17).
‘Hinkho-manpha’ bang e?
Thutah poimaw pente lah a khat ahileh hinkho-manphatna thei ding khu ahi. Hinkhuo khu thakhat thu (accidental) a hing kibawl/hing mawh um ahilouleh sing hawm-suonghawm apat hing pawt doh ahisih chi kithei hi. “Mangpa khu noute hing siempa leh naubu sunga hing siempa” chin Isai in ana gen hi (Isa 44:2). Nu- naubu sunga pat siema ki um a, accidental a hing pieng ihi lou a’hileh hinna in akizahna, poimawna leh azieh (purpose) anei china ahi. Ludwig Wittgenstein in tambang in ana gen hi, “To believe in God is to realize that life has a meaning (Pasian gintat khu hinkhuo in umjie/manphatna anei hi chi theikhietna ahi)”.
Hinanleh, hinkhuo khu saulou jel hi. Psalm laa in “muol a pape” toh ana tekaah hi. Greek poet Homer kichipan hinkhuo khu nata/singna toh tekhin a, Greek philosopher Empedocles in meikhu (smoke) toh kibang in gen hi. Job in “mihing damsung hun pen bihieh sa ahia, ahinkum ding zong tee sa ahibou hi” chi hi (Job 14:5). Khatvei toh Thugenpa tangkouna ah lut kia vai. Aman khovel sil umdan teng - leitung pilna siemna, Pasian silsiem lamdanna leh Pasian in mihing asiem a hinna apieh, leitunga hinkhuo azahsah dan thugil zousie theisiem tum in ana sui tinten a, hinanleh, lawsam hi.
“Keiman kalungtang ah Pilna leh mihing khat in sun leh zan a ihmu lou zen a, anasep gimdante theisiem ka sawm lai in, Pasian silbawl zousie kana mu hi. Nisa nuoi a ana kibawl nasep zousie mihing in amudoh thei sih hi, suidoh ding in…panla nanleh amu tuomlou ding zieh in, mipil in thei tum ngong nanleh amudoh zou tuom sih ding hi, chi kamu kheta ta hi” (Eccl 8:16,17).
Pilna mihing in nei nanleh abukimlou (limited) ahi chi hing theisah a, tuazieh in Pasian’ pilna leh Ama apat pilna ki tangh/kizil khu pilna buching pen hing hithei pan ding dan hi. Tualeh, leitunga ihinsan pen uh bang a’ta diei le? Pasian khu ihinna lailung tah a tengsah ding; tahsa-hagau a khanlet ding, imihing tanpite, uleh naute (adieh in migentheite) lungsiet a panpi ding leh vannuoi a Pasian silsiem dangte it a kepbit ding chite hilel lou ding amah? Athupi pen itna nei ding chi Bible ah kigen hi. Apoimaw vawt khat khu leivui a siem leivui ma a kile kia ding itahsa ahia, ihagau ashithei nonlou ding pen in heilam azuon diei? Ihagau zotmun ding itahsa damlai pet a siemtup masah ding khu mihing hinsan poimaw pen hiva kachi hi. Tua bang in bawllei ‘hinkho-manpha’ pen nei leh zangtu kihimai lou ding e..
Sawltah Paul in ‘hinna’ khu mitmu toh kisai hilou in, ginna toh kisai ahi dan ana gen hi. Nikhatni chienga Vangam a umding ahi dan ana gen masa a, hinanleh, khumi ni hing tung masanga leitung ateenna mun a hinkho man dingdan zong ana gen hi. “Tasung inn ahiei khusung inn ahiei ah ka um zong un, Ama kaki pahsah nuom uhi” (IICor.5:9). “Tasung inn” achi khu leitung agenna ahia, “khusung inn” achipen vangam agenna ahi. Theidi’a poimaw pen khu Paul in ama mai hilou, gingtu zousie’n vangam atunchieng mai ua hilou in, leitung a atensung ua zong Pasian na sem a kipahsah ding khu adeisah hi. Leitung a Pasian kipahsah nading a ana sep khu bangte ata diei le? Sun zan a Pasian kunga thum thum mai ahisihleh Athu gengen chite mai ahi diei? Tuate banah, ulenau kilungsiet a migenthei lungsiet ding leh tahsa hinkhuo leh nasepnate a dihtat ding chite zong telpha mama hi. Apoimaw pen zong hiphiel ding hi. [Beita]
[Laigeltu ikup nuom leh suopizou@gmail.com]
Subscribe to:
Post Comments (Atom)
Posts
No comments:
Post a Comment