THANGBOI ZOU ARCHIVES

S. Thangboi Zou,
NEHU, Shillong.

“Kanau Henry aw, ahithei leh vapei da mai in, Delhi asat a sa ahia, asatdan khu Va-ah (crow) nasan zong athuahla a kam-ka vawt ahi. Kisia teitei vateh, vapei sin..” chia ka upa (cousin) Mr. Malcolm in Darj Hill a ka um lai ua zankhat ang na khamna pen ka lung ah a’ng kilang kia hi.

August 10, 1998 zankim nai 11 a ging ta hi. Kanasepna mun khu Mayapuri Industrial Complex mun ahia, atangpi in khawl nasepna munpi ngen ahi. Bus ngahna-buh (waiting shed) ah kaseppi kolvom ngen toh Bus ngah in ka ding lemlum gam ua, hinanleh, hunsawt lou kaal in kaziet-kavei a kadinpiten bus ang mat san sieng ta ua, atawp ah kei maimai kading ta hi. Bangchidan adiei mah, tua zan in ka umna Palam Colony zuon ding bus ava’ng mama hi. Kamai lam ka et phei chieng in muphah natan street light asan phimphem a, zanlai huivot ten ang sem hieu hieu a, tuachiin katunglam kava entou kha a – hapi zong anua-delh um ma bang in, tumlam manaw in atai veng veng a, khatvei teng meilum vompi khat in alia jel a, ahinlah ang dawh doh jel sam hi. Bangchi adiei mah, asan-au pempom a, tua zan in vang hapi zong atan siem vawt sih hi. Ka lung aleng mama a, hinanleh ka sunglam ah thawmhauna lienpi khat zong kanei hi.

Pawl sawm (matric) ka zaw zou laitah, June 1997 in Zogam ah sanggam-melhai huipi hing lang in kazil ban PUC zop thei nonlou in ka upa (cousin) in Darj Hill a asepna(army) posting namun ah ang puitou tahi. Hinanleh, September 1997 ahi tah man in tuamun ah college admission teng kikhel in sunzom theilou in kava um jel ta hi. Innlam kile kia ding chilei lah niteng a thukiza khu “tuami khuo kihal in mi khuzat shi…”chite ngen ahiman in vapei kia nadan umtheilou hi. Atawpkhon in computer Certificate course ka zil a, akumkia 1998 June ha chienga college admission bawltha mai ding in thutanna kanei mai ta uhi.

Thei manlou kaal in hun le ni hing liem in May 1998 hing tung man hi. Maban college kai dingdan lungsim geel pum a hinkhuo kana mantou jel lai tah in, zan khat, Jackson nu leh pa ka inn uah hing haw kha uhi. Amau nupa kung ah Jackson (kum 24) leh a unu Cylvia (kum 26) tanchinte kana dong hi. A unau ua Darj hill apat Delhi a sepna hawl ding a kuon khie ana hi ua, tu a Pvt. Company ah sem ua, halaw siingval mu ahi dan ang gen pi uhi. “…Tuajieh in Henry nang zong vapei lechin nasepthei ding sil umtei sam dinga, nang le nang kitoudel thei ding nahi” chiin Jackson pa in ang hanthawn hi. Tami hanthawnna kamteng kazah khu’n katha anuom sah mama a, mijawng leh neilou aki hina toh, innkote subuoi kha nonlou a eima le eima kitoudelthei ding chi kangaituo chieng in Delhi a va umkhiet kaal kangahla ta mama hi.

Hun sawtlou nua in Jackson Delhi apat Darj Hill hing pei chi thu kazah tah in, Delhi a sil umdan dong chien ding in a inn uah kava haw ta hi. Jackson in bangma thusau ang houlimpi nuom seng sih a, hinanleh Delhi umleng nnasepna khattei nei ding a lai zong sim kawm thei ding kahi dan ma ang na genpi kia thouthou hi. Tuazieh in thalawpna lienpi toh Delhi pei ding in thutanna ka bawl suh maita hi. Inlam a innkote kadonga, hingphal chet sih nan ulezong kathanopdan ajah chieng un ang kham ngam seng sih ua, keima thuthu in ang koipi mai uhi. Hinanleh ka upa Malcolm in vang ahitheitan in angphal sih a, ang kham kham nalai vang in, khamzou ding guolte kahi nawn sih hi.

June ni 7, 1998 zan in Jackson toh amau inn ah kagieh khawm ua, azingni zingkal matah a Delhi zuan a pei ding kahi ta uhi. Khum zan ka ihmu thei mawng mawng sih a, azieh zong kathei tuon sih hi. Kei chauh ihmu theilou kamah kachi lai in Jackson zong a ihmu thei tuon sih hi. Azingni zingkal in kei, Jackson leh anaunu Rosline, kathum un Delhi pei ding in Darj Hill apat Siliguri kazuon ta uhi. Train reservation bangma bawllou pi in ka kuonkhe thop suh mai ua vangphat huoitah in Sleeper class kamu ua, Delhi zuon in katou ta uhi.

Train sung katou un lamkal ah Jackson umdan in ang sulung kham mama hi. Ahun tamzaw kakung uah hing tou ngailou in compartment tuomtuom ah vah lele a, sunchieng tomkhat ten ang toupi jel hi. Keipen mundang gamla zin ngailou kana hizieh in kalung akhampi thei mama a, hinanleh Roseline pen in phamaw asah teuh sih hi. A upa umdan lungkhama kadoh chieng in ang ngaisah ut se sih a, “anop nop na ah um ta ven” ang chisan giep hi.

Zankhat kalung nuom thei nonlou ahiman in Jackson enkhe ding in kading doh a, daba tuom kava hawl lele lai in toilet gei khat ah kava mu doh hi. Tua kasil mu in ang jau sah mama mai hi. Jackson toilet bang ah akingam a, amit sing in atahsa pum aki sat zotzot a, akamsung apat in chiltui phuon akai khe zengzung hi. “Ulal (Jackson) bangchi ne, bangchi ne?” chiin atahsa kaloh a, tomkhat zou in amit hinghah a, kei angmu tah in nopmaw asa mama a, “E, bangma chi sing e, imaw, Siliguri a inga (fish) neh in ang bawl ahi, kasung asia hi” achi a, hinanleh gintat ha kasah deu hi.

Delhi katung un Jackson unu Cylvia Ching umna mun ka phone ua, hiunanleh ana kisuon ta a, asepna office zong ana kisuon ta hi. Delhi katun in khuo lum kasa mama a, ana kigen dan toh kibang kasa simsim pan hi. Tun na ding inn kathei non ta sih ua, Manipur Innpi ava tun ding kachi chieng un kalawi tegel Manipur a um ngailou ahi jieh un a ut sih ua, Nagaland Innpi kava zuon uhi. Nagaland house kava lut ua, asunga receptionist ten registration hing bawl sah pai lou zawzen ua, kaki tawldam phot uhi. Jackson daileng ding in toilet ava lut a, dahkal khat lam ava tou tazen hi. Amapa ngahna kawm in Roseline in amelthei mi khat, ainn ua tunthei ahi khah leh chiin phone ding in ang pawtpi hi. Tomkhat zou in phone boot apat Roseline hing pawt khie a, a inn uh aneu seng zieh in tun theina hilou ding ahi dan ang gen hi. Nagaland house kalut kia un Jackson pen toilet apat ana pawt tasam hi. Kichen sunga ann huon te toh ana kihou a, amel ka et leh amit angui jen jun a, a awh zong suoh thei manglou in, ihmu thoupan abang a, houpi thei tahtah ahi sih hi. Toilet sunga ava lut zou ahing pawtdoh kia chienga hibang a amaisuoh kilamdan thei pen kathei patna ahiman in lamdang sahnan kadim a, kaki geel thakia a, Siliguri a toilet baanga amel puoh toh kibang chet kasa a, nanleh bangchi e chi kakan ngam dieh sih hi. Kalungsim ah silkhat hing kilou a, “oho! tampa pen loutang ne hi ngel va e,” chiin kangaituo pan ta hi.

Nagaland apat kipan kahilou zieh un Nagaland innpi ah ka tung thei ta sih uhi. Sun nisa khu mei am abang hiel a, kal som vel isuon zou chieng in idang atah paipai a, champara tui kaha dawn mama uhi. Jackson te unau in phone asuh bawl atou bawl khop thithe ua, hinanleh bangma aphatuom sih hi. Delhi khodung khovai kaki viel lele ua atawpkhon in nitah nai 5 bang aging hiel tahi. Delhi Cantt. lam kava zuon ua, Nepali sepia Mr. Bahadur kichi khat kava sui ta uhi. Sepai ten Roseline amu chieng un a en nuom thei mama ua, mitphelou hiel in a en den uhi. Tomkhat kana ngah uleh, Bahadur ang tung a, ka bawn un a quarter ah ang pui ta hi.

Bahadur inn a ka um sung ua, kalung guot pen uh khu Jackson unu Cylvia sui khiet ding chi ahi. Hinanleh Jackson damlou kipan ngal a, malaria hing vei in lupna tung angah den tahi. Tuachiin kei leh anau nu’n lah mun leh gam katheilou zieh un hapta khat lam bangma bawl theilou in ka umden ta uhi. Cylvia contact theina ding lampi kasui sui ua, hapta ni vel zou in ang tung khong sam hi. Kalung a nuom dawm a, kasum nei teng akim khat vel amanu kape khie hi. Tuachiin Cylvia zong kou toh Bahadur inn ah ang um phot tahi. Zankim teng in Jackson adamloupa khu ana thou zing a, agieh khawm kahi vang un kakhahlaw teng in kakung ah ana lum ngai sih a, baang ah ana kingam in, amangham dan deu in anop-nop tengpi agen zing hi. Zingkal khat ka inn neipa un toilet septic sung ah kikapna phin (syringe) ana mu kha a, koima theilou in kei ang dap doh a Jackson umdan hoilou ahi dan ang genpi a, alungthah mama hi.

Hapta khat zou vel in Jackson zong ahal dawm ta a, khatveivei Bazar ah apawt thei tahi. Nikhat newspaper apat in “job vacant” chi kamu a, kava interview leh Sales & Marketing lam ahizieh in bailam tah in angla ta uhi. Zingkal nai 8:30 a sepna office tun ding, khunah naikal khat sung vel ivan zuoh dingdan training hing kipie hi. Tuazou chieng in Delhi khopi muntuom ah itang chiet in ivan zuoh ding in akidieng lele a, Delhi nisa nuoi ah, mi kotbieng, mi office teng ah va ki vah lele in kamsiem thei tawp in va kiham a, ivan vaki zuoh hi. Mikam siemthei kahilou toh, kavan zuoh puon-ah (kameez) ahoi seng lou toh koiman ang leipi ut sih a kakhawng zou mawngmawng sih hi. Ahasatna khat khu zingkal ann ne manlou a kikuon zing, sunni sa lah ‘meidil cheplawhna’ bang vawt, kalkhat isuon leh idangtah paipai ahiman in sum aheh mama hi. Kasum nei teng ang bei hiei hiei tahi. Kalungtup ahile nasep kom a college kai ding chi ahi.

Jackson malaria in ang pha jel a, akhosih ahun-hun in ang nei jel hi. A sanggam numei tegel in lah bang lung ageel uh ata diei, lou tang khat zong alei pi ut tasih uhi. Ama pan sum nei nonlou ahichieng in ken pharmacy leh private doctor te kung ah kava pui jel a, damdoi kalei sah mai hi. Akal vang chieng in amapa zieh in kasepna mun ah kapei thei sih hi.

Hakhat chinglou deu Bahadur inn a ka um zou un, muntuom a kituon khe ding in ang ban nawdoh tahi. Lawihoi tah khat kanei ua, ama ahileh Mukesh Kumar kichi MBA student ahi. Ama inn ah nithum vel ka um ua, tua zou in Palam Colony lang ah ka kituon ua, ei singtangmi khat beh umlouna, kol kulmut vawt ngen umna mun kava tung uhi. Kasum teng lah bei ta, Jackson lah damsieng thei ngailou, khatveiteng numei tegel in Jackson toh kihau in kei leh Jackson ang nusia jel ua, anntang huon ding umlou, neh diing bangma umlou in ka um top jel uhi. Silbangkim Jackson chatvai jieh ahidante u Cylvia in ang genpi jela, bangding a hi Delhi a hing pei a Jackson kang jui adiei chite hing dong in Jackson in juou leh naal a anu leh apate ahem banah kei nasan ahing kimawh juisah pen Cylvia alung thah mama hi.

Kasum beita ahiman in ka office peina bahara leh ann neh na ding nasan zong kanei non sih a, katawp mai ta hi. Cylvia in High School khat ah Asst. Accountant na khat amu a, niteng in akuon khia a, adang teng nasem umlou in inn ah kamawh um mai uhi. Neh ding angpuo hun in kane ua, ang puohlou hun in kangawl mai uhi. Koima eimi toh lah kakithei sih ua, kouteng maimai kol leh vai lah a ka khosa uhi. Sepna dang kahawl chieng in lah sales lam ngen ahi a, vanzuoha Delhi khopi a vah lele kia ding kageel thei non sih hi. Siemna (qualification) lah matriculate maimai kahi banah, bangma siemna ‘skill’ dang kanei lou zieh in kana sep ding ava’ng mama mei hi. Ka computer thei teng zong kakhoikhah louna asawt seng tazieh in kamanghil sieng ta a, kaki muong zou nonsih hi. Nasep khatphot ah asiemsa (experience) dei jel ua, keipen khat beh a ka china a um sih hi. Nisa nuoi a vah loua nnasepna khat phot kimu leh kachi mama a, hinanleh bagma kamu zou sih hi. Jackson lah dampan ichi chieng in sawtlou kaalin adamlou kipan jel a, Roseline inlah nna asem ut nai vet sih hi. Hunsawt kuom sim ahi ta man in College admission teng aki khel sieng tahi.

Cylvia in Delhi khopi umdan leh mite hinkho mandan ana thei tam mama a, ei Darj Hill vel town neu te toh Delhi metro life kikhietdan ang genpi hi. Adieh in numeite ading in siettheina ding hun (chance) atam mama hi. Company manager khenkhat ten numei nasem a guonte uh lemchanna a zang in, physical relationship (tahsa kichimatna) anei thei nading un a law uh supung ding bang in zawl zel dan ahi uhi. Numei tampite hichi bang thaang ah awh ahi dan uh Cylvia in agena, amanu mama in zong khumbang zawlna/chielna tuohkha ahi dan zong ang hil hi. Cylvia zong ana umna sawt senglou ahi zieh in eimi koima melthei anei seng sih hi. Kabawlkhiel khat ahileh, Delhi kapei masanga eimi ana umsate koima ka contact khahlou khu ahi. Hinanleh Cylviate unau bel dinga vakuon khie kahi a, amauh kana pum muon khah ziah ana hijel hi. Ka High School kailai a ka best friendpa Steve Haokip khu Delhi heimun tenga um ahiei chi kathei khamkham in kakan zelzel a, hinanleh koiman anghil thei vawt sih hi. Ka umna veng uh lah kol kulmut ngen ahi toh koima ang lungsiet ding akimu sih hi.

Bangzieh a tami mun a vatung kha kata de aw, chiin kisiana ngen in kadim tahi. Kalungtup – Delhi a nasep pum a college zop ding leh innkote subuoi khanonlou ding, chi ana hia, tunvang, ani in bangma kamuolsuo zou aum tasih hi. Nasem ding in lah siemna kaneilou toh ka qualification aniem toh, bangma kei a ding a umthei sih a, college kaiding kachi chieng in lah sum kanei non sih hi. Ka innkote kung ah ka hinkhuo umdan kagen ut sih a, kapei kuon a hing kikham a phallou sasa a keima utna toh pei kahi chieng in kisuonglana in kadim a, koima bangmathu kahil ut sih hi. Ka innkote zong ha ni (2) lam katungtang thu zalou ahichieng un alung uh nakham seng va kachi zieh in ka Unu Mercy, Lamka a um, lai kathon a, bangma buoina tuoh lou a college zong kaithei kahi chi in zuou kagen mai hi. Hinanleh, kalaithon dan ka unun asim chieng in alungnuom thei tahtah lou hiding hia, bang dinmun a um kahi e chi ang kan tin ten tahi. Hinanleh bangma ka dawng kia non sih hi.

Jackson hinkhuo umdan khu nuo in kang thei pan nabou hi. April ha in aunu toh Delhi ana zuon ua, tuamin Sales & Marketing Co khat ah nna asem a, sempei suoh lou in ana tawpsan tahi. Niteng hunteng in aunu Cylvia kung ah sum angen a, apieh lou chieng in vuoh sawm in agii den keei a, asum nei sunte in damdawi tang leinan azou zel hi. Darj Hill umlai in bike accident na ah akhutgu asu kha a, tuami jiah in akhut dam sieng thei tahtah lou in aum den hi. Akal vang chieng in ana (pain) thuohla seng in akikou vapuol jel a, anat thuoh nopna ding in damdawi tang (pain killer) ane zing a, tua khu azawngsang (addicted) gawp dan ahi. Tua pain killer maimai a hunkhop hinonlou in ana pei sau sim dan hileh akilawm hi. Daileng ding in ehbuuh alut a, atompen in dah kal khat teitei hun ala zing a, alut chienga bangma chilou alut hina piin, ang pot doh chieng in a melpuoh ngai abang sih a, amit ngau jenjun in ang pusuo jel hi. Tua khu asanggam numei tegel in zadah in aphawh chieng un lungthah in akihau jing uhi. Nidang huna damlou a aumlai a keplou donlou a koi te uh lamdang sa in “bangjieh a Jackson nahi chi ngaisahlou uh e?” chia kana doh chieng in Roseline in “khatvei chieng nathei hun hing um na ven” ang chi san giepte khu adih dan kang man pan nabou hi. Jackson pen dam thei mama lou ahichieng in lampi dang um nonlou in innlam a kile kiamai ding in kajawl ua, tuachiin innlam apei khong tahi. Hinanleh apei nuo in vengsung a dawr bawlte kung ah zuou a hem in van bat in ana la hi. Apei zou in, nikhat ka ke’dap repair sah kava lah leh gas leh siah (iron) tuomtuom repair bawl Bihari ten ka kedap khu Jackson sumbat toh kithung ding in ang nalasah ta mai uhi. Ke’dap khat sunsun ahoi zong hilou kanei khu katanlaw vawt a, nibangzat e khat zou in Cylvia in sum ang pia a kava tan khe kia sam hi.

Hun hingpei jel in September ha hing tung khong tahi. Nikhat Cylvia in alawite Punjabi, factory manager khat kung ah kasepna ding angva nget piah a, tua khu Mayapuri a um ahia, ke’dap leh akhau (lace) bawlna factory ahi. Tuanah niteng zingkal lam nai 9 apat nitah nai 9 tan nna kisem a, Pasianni nasan zong kikhawl theilou hi. Tomkhat zou in Christian kahi natoh Pasianni suty kei maimai ang pe ta uhi. Kanaseppite khu atang piin Bihari labour ngen ahi ua, e’n amauh isim maw bawl sim leh amaun zong ei bangman ang mukia sih uhi. Kei chou singtangmi kahi zieh in ang simmaw thei khop mai ua, kapan tung laiteng bang kamdam in zong anghoupi khasih uhi.

Nikhat Cylvia sepna lui school address ah innlam apat in ka laithon ding hing tung chiin ang gen ua, ala di’n kava kuon a, lampi peikom a lung kageel geel leh kanuolam ah bus khat hing tai, a horn ameh ging kana za sih a, thakhat in kakinuo hei leh bus hat deu in angtai khu’n ang phu kha deh tah a, angphu khahna ding inch 2 le 3 vel chauh in aki vat hi. “Kadei aw nu, shi tang e!” kachi lai in bus atai suoh vut mai hi. Kazau sengseng kadip akihot den keei a, suntung tawn in ka dip ako den hi. Ka upa Malcolm in Darjeeling apat lai ahing thot ana hia, “Henry nang jiah in innkote alung kham thei mama uhi. Bang dinmun a um nahiei chi bangma lah koiman akithei sih a, natanchin beh hing hil thei lechin ka chi uhi. ….Ahin, nangma kingam a peita nahi chieng in hing tahpan mai in len genthei hasat nathuoh zong in hing thuoh den mai tan….” chin ang giel hi. Kalung ah, “mithu manglou a pawt kahi chieng in, koima kangaw thei sih a, tami mun ah kashi zong in ka um den mai ding hi, mikhat kasuoh mateng in” chiin kalung katah (hard) sah den sawm ta hi. Hinanleh, kalungsim thuh tah ah kakisia mama a, bang vatuoh kha katade aw! chiin kaki ngaiseh thei mama hi. Zanchieng in ka inn tung uah kava kal a, kathei kham in Pasian ku’ah thumna vanei jel in, “Mangpa tami Delhi khopi ah hasatna chikim kaphu ta hi, ahithei leh hing lakhe mai tan” kachi jel hi.

Sun khat lunch break laitah miteng ann ne di’a apawt siang lai un, kangen tang in sing phung nuoi khat ah kava tou leh kagim seng man in kava ihmu suh khata a, mang (dream) ka nei ta hi. Kamang in Delhi khopi ah kana vah lele a, sa kasa mama a, kakhosa ul in kadim a, kana gim thei mama hi. Kamang hel/noplou seng ahi jiah adiei kakhanglou pai a, nisa in ang nakap kha a, tuami nisa thuohla a kamang nasan a kana mat dan ahi. Keizong nihim lam deu ah kikhin phei a, kava ihmu suh kia kha tahi. Tuamin mangkhat kanei kia a, kamang khu amasa a banglou in anop mama a, ka umnalui Darj Hill lam ngen kava mat tahi. Darj Hill a ka umlai a Mariah toh ka hinkho man dante uh kava zil kia a, anop mama mai hi:

Mi innsung khat ah lawite toh TV en a kana tou dim dem laitah un gintatlou piin Mariah anglut hi. Mi kitam sim ahiziah in kahoupi ngam seng sih a, hun tomkhat zou in dingkhie in apawt tahi. Kei zong dingkhetou in kanuo del phei pai a, “Mariah, Mariah” chiin kanuo hat leh, ang dawng ut sih a, ken zong hat deua del in kanuo phah ta hi. “Kisathei nachia kanghat lezong nang dawng ut sin!” kachi leh, “kei a kisathei kahi di? nang na veleh akisahthei” chiin ang dawng hi. “Banglah kakisahtheina?” “Akisathei hilou di’ chin maw, zing chieng a kipei ta di’a inn a zong nang haw nuom lou”. Khum in lamgei a suongtung khat ah katoukhom ua, kaki houlim gel uhi.

“Mariah, ash! nou jing a pei ta ding hi uchin a maw… ngai huoi ve chin maw.. keipi bang kachi hin ding ata diei, namgmelmulou a?” “Henry lungkham sin, tun kikhenlei zong khatvei chieng in kimukia ni hing tung thou nalou ding maw”.

“Mariah, nang midang ngai ta ding hichin a maw”, chia kagen kia leh, amit phelou in ang en kilkel a, “Henry ngai in, ken midang kapien apat koima kana ngai khanai sih a, maban ah zong nang bang a kangai ding mi um sih va, lungkham sin nang kang it mama a, kami it-theina teng toh kang it nahi” chiin ki-imlou in ang gensuh zungzung mai a, kakipahna asang mama hi. “Nang ka first love nahia, ka last love zong nahi ding hi” ang chi nalai hi. Koima umna phawh khalou zen a ki-ittah leh kihomthaw tah a kana toukhom thit thet laitah un, ka upa Malcolm in “Henry, Henry” chin innmai apat kikou in ang han a, tuachin thakhat in ka khanglou tahi.

Ka khahlaw ahileh kagei a kaseppi kalawi Nepalipan “Henry, Henry nasep kipat hunta, thou in” chia ang na phawng dan ahi. Kalung ahel mama a, kahunluite ang phawhtha sah kia a, Mariah kangaina akuong dieh hi. Kalungsim ah geel lou ding teng kang geel tha kia a, Darj Hill ka umlai ua, Mariahpa posting muntuom a pei ding ahi tajieh in, a innkuon un apa umna ding Chandigarh zuon in apei ua, kakikhen masang ua, itna thu kana lelkhawmte uh kamanga kanuo mat kia ana hi dan hi. Delhi ah sum leh pai dei naziah apei hinanleng zong asung guh a koima theilou - azieh dih tahkhat khu, Mariah toh kana um khawm lai un kana kiha gop mama ua, kalenkhawmna munluite enzou nonlou a Darj Hill ana nusia ut ka hidan kalung ah ahing kilangtha sah kia hi.

Nikhat ka unu Mercy in lai ang thon kana mukia hi. Tam alaithon kasim in kalungsim suong banga tah khu ajunn sah sieng hi. “Bawi na dinmun teng na gen utlou vang in kathei siem tahi. College nakai sih chi zong gense lou in katheisiem mai a, tuazieh in hing kile kia mai tan. Bangma nanga ding in tam khovel ah akikheel um nailou ahi. Nalung neu sah sin, inn ah hing pei inlen nalai sim hingpan tha kia mai in…” ang chi a, kasim in ki-ipzou lou in kamittui aluong zutzut mai tahi. Kenzong akin theipen a reply bawl kia in ka umdan tengteng akim sitset in kagenpi ta a, tualou in, kapa a ding in zong laithon kagiel a, “nathu uh manglou a keima thuthu a vai kakihawm tah jieh in, tabang dinmun ah kading tahi. Innlam hing pei vang in college zong kai da mai tang, kasum zaw khiet teng tam seng ta! Ahithei leh inn ah um maimai vang in, nasep ah nang leh kanu hing panpi mai tang” chiin kisuongla pum in kagen hi. Hinanleh, Aw!! Nu lepa ule naute itna alien mama hi!! U Cylvia kung ah zong ka innkoten hing pei mai tan chia ang hat uh ahi chite kagen chieng in, amanun zong, tami mun a, tabang hinkhuo zanga ka um um sang in inn lam vapei kia a, laisim vapan tha ding in ang deisah dan agen hi. Ang vaihahna thupipen khu “Henry, hi Delhi khopi a mite hindan nathei dim diem ta a, mite bangzahtah a hahpan (hard working) ahi dante namu hi. Nahinkhuo ah hakatna ana mangsah het sin aw” chiin ang hanthawn hi. Aman zong nikhatni chienga mikhat suoh tei a, Delhi a hinkhuo a struggle dante laibu khat ah giel khe teitei ding ahi dan ang hil hi.

Delhi apat Darj Hill ah ka u Malcolm kung ka zuon kia a, tomkhat zou in innlam -Manipur zuon in ah kapei ta hi. Tuana pat in, khovel bang ahiei, bangchi tuh a lien e, koite khovel a chethei leh koite chemaw ahiei, siemna leh pilna bangzatah a manpha leh silbawl thei a, mite dinmun asuh sang thei ahiei? Khopi ah siemna neiloute ding a hinkhuo ahasatdan, khopi a kilungsietna atawmdan leh miten bangchi banga hinkhuo aman ua, mite bangtan a gin um a, bangtan a chalak ahi uoi? Sepna hoi muna dinga siemna/zilna sang leh ahoi poimaw dante leh keibang a siemna neilou leh matriculate maimaiten bang nna asepthei giep uh ahiei? chite zousia Delhi apat in kathei khe sieng a kazil sieng tahi. Hinkhuo kichi namailou leh nuom mailou ahidan ang muchien sah hi.

Jackson pen Darj Hill apei nuo in, anu leh apa kung ah Delhi a peiding in kitum kia dan ahi. Anu leh pan abuoipi peilou zieh uh ahi diei vang thei sing, athu amangpi kia ua, Jackson maimai hilou in, anaunu Celine toh Delhi ah asawl kia uhi. Delhi umlai a kou a unauteng ang suh buoi dan leh ahinkho mandan ningkitel ahuoi dante kangaituoh chieng in Cylvia bangzatah in alungthah tadiei maw…? chi in kageel zing a lungsiet um kasa mama hi.

December ni 3 niin ka u Mercy te inn, Lamka ah katung hi. Kamel ang muchieng un kipahnan adim uhi chi kathei siem mai hi. Nitah ann nehzou innsung ah kakhawldam ua, tuanah vengsung papi khat leh ni hing kholai vahte kihoulimna kangai hi. Delhi a hing kipan kahi dan leh Delhi khopi hinkho umdan tangpite ang kihoulimpi ua, kahinkho mandan tahtah mi ku’a gen ding anuom chiem sam sih hi. Khum hun laitah in papi khat in “Henry nang Delhi a hing kipan nahi leh, Darj Hill a um Francis tapa tang neisun Jackson Delhi ah shi akichi a, nang ana thei khalou na mah?” chiin ang dong ta mawh hi. Lamdang sahnan kadim a, gending kathei pai sih a, tuazou in, “bang e, bang e, Jackson shita e !! Bangchi shi , bangchi dan in la ????!!! [BEITA]